Comunità Ruandese in Italia

Mu rwego rwo gukomeza guteza imbere imibereho myiza y’abaturage no gushyira mu bikorwa indangagaciro z’Ubunyarwanda, abari n’abategarugori ba Diaspora Nyarwanda mu Butaliyani bakomeje imihigo mu igikorwa cyo gufasha abatishoboye kubona ubwishingizi bwo kwivuza (Mutuelle de Santé).

Iki gikorwa ngarukamwaka cya Diaspora, kuri iyi ncuro cyashyigikiwe byumwihariko n’umwiherero, wabereye i Sirmione, wahuje abari n’abategarugori bo muri Diaspora yacu, baganira ku ngingo zitandukanye zigamije iterambere n’ubufatanye. Uwo mwiherero wabaye umwanya w’ingenzi wo kungurana ibitekerezo no kurebera hamwe uruhare rwa Diaspora mu guteza imbere imibereho myiza y’Abanyarwanda by’umwihariko uruhare rw’umwari n’umutegarugori mu rugendo rwo kubaka igihugu cyacu.

Mu byaganiriweho, hibanzwe cyane ku gushimangira ubumwe, ubufatanye ndetse no kwimakaza indangagaciro ziranga Abanyarwanda baba mu mahanga. Muri urwo rwego, abagore biyemeje kuba iyambere mu gutangiza iki gihembwe cyo gutanga mutuelle, igikorwa gifasha abatishoboye kubona ubwisungane mu kwivuza, nk’imwe mu nkingi z’ingenzi z’ubuzima bwiza n’iterambere rirambye ku gihugu cyacu.

Nk’intangiriro y’iki gikorwa, abari n’abategarugori bitabiriye uwo mwiherero babashije gukusanya inkunga igera ku 1500€, igaragaza ubushake n’ubwitange mu gushyigikira imibereho myiza y’abaturage. Mu ntego rusange za Diaspora, hateganyijwe kugera ntibura ku 4000€, kugira ngo ubufasha bugere ku baturage benshi kandi bugerweho neza.

Ni muri urwo rwego, comite ya Diaspora iboneyeho gukangurira buri wese kugira uruhare mu kwifatanya n’iki gikorwa cy’indashyikirwa, hagamijwe guteza imbere ubuzima bwiza kuri buri mu nyarwanda ndetse no kugira uruhare mu iterambere ry’igihugu cyacu.

Umwiherero wabereye i Sirmione wanagaragaje uruhare rukomeye rw’abagore mu bikorwa byo guhuza Abanyarwanda no guteza imbere ibikorwa bifite inyungu rusange, haba mu mahanga no mu gihugu cyacu.

Iki gikorwa cyatangijwe n’abari n’abategarugori kigaragaza mu buryo bugaragara uruhare rwabo mu bikorwa by’iterambere n’ubwitange, kikaba n’intambwe ikomeye mu gukomeza guteza imbere imibereho myiza y’abaturage. Kandi kigaragaza by’umwihariko uruhare rwa Diaspora mu kwimakaza no gusigasira indangagaciro z’Ubunyarwanda, nk’Abanyarwanda baba, biga cyangwa bakora mu mahanga.

Iki ni kimwe mu bikorwa bigaragaza uburyo Diaspora ishobora kugira uruhare rufatika mu iterambere ry’igihugu, binyuze mu bufatanye, ubwitange no gushyira hamwe.

Umusanzu utangwa binyuze kuri iyi link https://gofund.me/0211334b7 wayisangiza n’incuti zawe.